Tojiboyeva Xavasxon Mirboboyevna

Tojiboyeva Xavasxon Mirboboevna 2008-yil 15-avgustdan buyon Farg‘ona viloyati Beshariq tumani 18-son Bolalar musiqa va san’at maktabi direktori lavozimida samarali faoliyat yuritib kelmoqda.

U 1971-yil 25-noyabrda Farg‘ona viloyati Beshariq tumanida tug‘ilgan. 1995-yilda Qo‘qon davlat pedagogika institutini musiqa o‘qituvchisi mutaxassisligi bo‘yicha tamomlagan.

Mehnat faoliyatini 1990-yilda Beshariq tumani 18-son Bolalar musiqa va san’at maktabida o‘qituvchi sifatida boshlagan. Ko‘p yillik pedagogik tajribasi, tashkiliy qobiliyati va rahbarlik salohiyati tufayli 2008-yilda mazkur maktab direktori etib tayinlangan.

Rahbarligi davrida maktabning moddiy-texnik bazasi mustahkamlandi, zamonaviy ta’lim sharoitlari yaratildi hamda o‘quvchilarning ijodiy salohiyatini rivojlantirishga qaratilgan ko‘plab loyihalar amalga oshirildi. Bugungi kunda maktabda fortepiano, torli cholg‘ular, xalq cholg‘ulari, estrada ijrochiligi, an’anaviy xonandalik va sozandalik, tasviriy va amaliy san’at, raqs, teatr, dizayn kabi yo‘nalishlarda sifatli ta’lim yo‘lga qo‘yilgan.

Direktor boshchiligida maktab o‘quvchilari viloyat, respublika va xalqaro tanlov hamda festivallarda munosib ishtirok etib, sovrindorlar safidan joy olib kelmoqda. Ta’lim sifatini oshirish, yosh iste’dodlarni qo‘llab-quvvatlash va milliy san’at an’analarini rivojlantirish maktab faoliyatining ustuvor yo‘nalishlari hisoblanadi.

Ko‘p yillik samarali mehnati davlat tomonidan munosib e’tirof etilgan. Xavasxon Mirboboevna "O‘zbekiston Respublikasining 30 yilligi" ko‘krak nishoni (2022), "Mo‘tabar ayol" ko‘krak nishoni (2023) hamda "Ibratli oila" ko‘krak nishoni (2025) bilan taqdirlangan.

Bugungi kunda Tojiboyeva Xavasxon Mirboboevna jamoa bilan birgalikda yosh avlodni Vatanga muhabbat, milliy qadriyatlarga hurmat va yuksak badiiy did ruhida tarbiyalash, ularning iste’dodini ro‘yobga chiqarish yo‘lida fidoyilik bilan faoliyat olib bormoqda.